 |
| الفلوجر أحمد صبري |
هذه التجربة قام بها الفلوجر المصري أحمد صبري وفي حديثه عن تجربته قال : أنا قررت ان شاء الله إني أختم القرآن كله 30 جزء 60 حزب 240 ربع 6236 آيه في ركعه واحده بس .
ويروي تجربته قائلاً : زي ما معظمكم عارف أنا كنت في الأزهر لحد سنة ثالثه إعدادي ، وأخدنا في السيرة إن سيدنا عثمان بن عفان كان بيختم القرآن في ركعه واحد بس ( ركعه الوتر ) ، كانت دماغي حرفياً بتلف ، كطفل طبعاً ومليان فضول ، إزاي الموضوع ده حصل ، وفرضاً لو الوقت كفى ، فإزاي كان بيخشع طول فترة القراءة دي أياً كانت عدد الساعات يعني ، والموضوع حيرني أكتر وأكتر كمان لما سمعت إن الرسول صلى الله عليه وسلم في حديث عنه بيقول : " لم يفقه من قرأ القرآن في أقل من ثلاث " ، يعني لو قرأت القرآن في أقل من ثلاث ليالي فالخشوع والتركيز مش هيكون كامل ومش هاتفهم القرآن كله يعني هتبقى بتقرأ وخلاص ، وطبعاً مفيش تناقض هنا ،لأن الرسول صلى الله عليه وسلم بيقول : " لم يفقه " ، يعني مش هايعرف يفقه القرآن كله وهو بيقرأه لكن ثواب القراءة ثابت طبعاً مش مشكله .
1- أول نقطة إختيار الوقت : طبعاً الشتا دخل فالعشاء بتأذن الساعه 6.5 أعتقد والفجر بيأذن الساعة 5 أو 5 إلا عشره فا في مسافه أعتقد كافية جداً للقراءة ، فاخترت الوقت مابين العشاء والفجر .
2- ثاني حاجه كانت إختيار المكان : أنا كان نفسي أعمل الموضوع ده في مسجد بصراحه ( كان من الصعب عمل ذلك بسبب الكورونا ) ، وما كانش ينفع برضه أعملها في البيت بتاعي نهائي ، ولاد اختك عايزين يلعبوا معاك وتعالى اتعشا والكلام ده كله ، فقمت مسافر اليوم اللي بعده على طول للمنوفيه ،لينا بيت عيله هناك ، ماكنش فيه أي حد .
3- بدأت الصلاة بعد صلاة العشاء بشوية ( الساعة 7 وربع بالضبط ) ، وطبعاً فضلت ماشي عادي جداً ،وما كانش فيه أي مشاكل خالص لحد ما وصلت لسورة الأعراف ، بدأت رجلي توجعني ، اللي هو كنت عمال أفكر لما رجلي وجعاني دلوقتي أومال يعني بعد شوية اللي هيحصل ، وكنت بصراحة في سورة الأعراف ناوي أبطل الـVlog وكان هيبقى Vlog فاشل ، لكن بعد كده في آخر سورة الأعراف حصلت حاجه كنت ناسيها تماماً وهي سجدة التلاوة يا جماعه ، سجدات التلاوة هي محطات الراحة بتاعتك في القراءة ، في سورة ص بدأت تظهر عليا حركات لا إرادية ، اللي هو رجلي كانت عماله تتشنج وضهري انت عارف لما تبقى في مصلحة حكومية في طابور طويل جداً ،ونقطة العرق تنزل على ضهرك بالبطيء كده ، ده كان الإحساس من سورة ص لحد الآخر ، والمشكلة كمان الأكبر لما وصلت لسورة النجم ، دي كانت آخر سجده والسجده اللي جايه بعدها كانت في سورة الإنشقاق ، يعني آخر 3 أجزاء ،اللي هو انت بتجيب آخرك وتشحط ،ماكنش فيهم ولا سجده فكان الموضوع صعب جداً .
- المهم الحمد لله وصلنا للآخر ،ولو في أي حد مهتم انه يعيد التجربة تاني ،ماينساش يشرب مايه كتير قبلها .
