َاعلان

‏إظهار الرسائل ذات التسميات ازاي. إظهار كافة الرسائل
‏إظهار الرسائل ذات التسميات ازاي. إظهار كافة الرسائل

الأربعاء، 27 يناير 2021

ازاي تجيب مجموع في الثانوية العامة - تجربة محمد العدلي الذي حصل على 98.3 %

 

نظارة على كتاب


يذكر محمد العدلي الذي حصل على مجموع 98.3 %  في الثانوية العامة لعام 2015 :

هاشارككم أهم 3 حاجات في تجربتي في الثانوية العامة ، أنا كنت ثانوية عامة 2015 جبت مجموع 403 من 410 يعني  98.3 %

بس  اهم حاجة لازم تحطها في دماغك وتاخد بالك منها ان مجموع ثالثة ثانوي ملوش علاقة بأي سنة قبل كدة ، يعني أنا مطلعتش من الأوائل ولا في أولى ثانوي ولا تانية ثانوي ، لكن مجهودك في ثالثة ثانوي هو اللي هايوصلك لأي حاجة.


هاقولكم بقى على الثلاث حاجات الأساسية :


1- حافظ على علاقتك مع ربنا وخليها كويسة هاتحس براحة نفسية ومش هاتحس بتوتر أو عصبية لما تيجي تذاكر والدروس هاتلاقيها متيسرة جدا.

2- حدد الدافع اللي انت بتذاكر عشانه ، يعني انا بذاكر عشان ادخل كلية كذا..  عشان أرضي أهلي .. عشان يوم النتيجة أكون فرحان بمجموعي و محسش بالنقص وسط زمايلي ، وعشان تقرب من الحاجات دي..  علق صورة للكلية اللي انت عايزها وبتحلم بيها في الأوضة بتاعتك ، كمان هات ورقة واكتب عليها "أنا عايز أكون كذا " وعلقها وكمان هات ورقة واكتب فيها حالتك اللي عايزها يوم النتيجة وبردو علقها ، هما دول اللي هايكونوا الدافع بتاعك وعلى طول قدام عينيك.

3- عدم اليأس ، متيأسش خالص ، أنا كنت بجيب في الدروس 18 من 30 ومع ذلك مقولتش على نفسي فاشل أو هأجل السنة أو هأقسم السنة ، لكن حسنت من نفسي وقدرت اجيب 29 من 30 في الدروس  ، ورغم إني مقفلتش امتحانات المادة دي في الدروس الا اني قفلتها في اهم امتحان وهو امتحان الثانوية العامة والمادة دي كانت الكيمياء، عشان كدة مش لازم تيأس عشان مادام ابتديت طريق لازم تكمله فمفيش معني لاي حلم طالما مكملتوش ، فايه لازمتها من الأول انك تدخل ثانوية عامة وانت هاتيجي في النص وتيأس ! يعني لو غلطت في حاجة اتعلم من الغلط دة ومتعملوش تاني يبقى انت كدة اتعلمت مش خسرت.  فالفشل بعد الفشل بيجيب نجاح.


وفي النهاية احب اقولك انت تقدر تجيب المجموع اللي انت عايزه. وكل المجاميع الكبيرة مش معناها ان عباقرة بس اللي جابوها ، الموضوع كله اجتهاد ولكل مجتهد نصيب.. اجتهد..  اجتهد..  وربنا هايكفأك.


المصدر : https://youtu.be/3-4ZCIiUdFw

أكمل القراءة...